Якубоўскага – Вялікая Аршанская

Галоўнай вуліцай Горак была Вялікая Аршанская. Такую назву яна атрымала, бо вяла на Оршу.

Пачыналася ля рэчкі Капылкі, а ў канцы горада пераходзіла ў дарогу аршанскага кірунку. На вуліцы знаходзілася гарадская лазня, пошта і скарбнiца, будынак дваранскага сходу, гімназія, царква, гарадская ўправа. У канцы вуліцы – праваслаўныя могілкі.

Пра гэту вуліцу захаваліся цікавыя ўспаміны вядомага пісьменніка Льва Разгона ў кнізе "Учора і пазаўчора". "Вялікая Аршанская мела ўсе адметныя рысы галоўных вуліц расійскіх павятовых гарадоў. Большасць дамоў на ёй была абабіта цёсам і мела высокія ганкі з абавязковымі лаўкамі. Чым бліжэй да гарадской плошчы, тым вуліца станавілася больш убранай і набывала ўсё больш гарадскі выгляд. Драўляныя тратуары рабіліся шырэйшымі, зрэдку з'яўляліся цагляныя дамы, якія належалі багатым габрэйскім купцам, і, нарэшце, вуліца пераходзіла ў гарадскую плошчу – цэнтр усіх матэрыяльных і духоўных інтарэсаў гараджан, асабліва хлапечага насельніцтва горада".

Вялікая Аршанская пасля рэвалюцыі была перайменавана ў Інтэрнацыянальную, а пасля смерці ў 1976 годзе Івана Якубоўскага – атрымала яго імя.