Уваход
На археалагічным комплексе на рацэ Менцы 7 ліпеня выявілі яшчэ адзін фрагмент посуду з радавым трызубцам князя Ізяслава, сына Рагнеды і Уладзіміра, паведамляе Нацыянальная акадэмія навук Беларусі.
Летась было зроблена першае падобнае адкрыццё, якое значна паўплывала на планы вывучэння тэрыторыі ля вёскі Гарадзішча Мінскага раёна. Маштабныя даследаванні гарадзішчаў і селішчаў вядуць на гэтай пляцоўцы з канца мая. Кіруе работамі Андрэй Вайцяховіч, загадчык аддзела Інстытута гісторыі. Разам з навукоўцамі ў раскопках удзельнічаюць студэнты беларускіх ВНУ.
Князь Ізяслаў кіраваў Полацкай зямлёй у 989-1001 гадах. Ён быў сынам кіеўскага князя Уладзіміра Святаславіча і полацкай княжны Рагнеды. Лічыцца заснавальнікам дынастыі полацкіх князёў. Вядомы ягоны радавы знак – трызубец з маленькім крыжыкам на сярэднім зубцы. У сучаснай геральдыцы ён увасоблены ў гербе горада Заслаўя.
Падзяліцца
1 633
