Пяць жыхарак Магілёўскай вобласці сталі пажыццёва народнымі майстрамі. Сярод іх – з Горак і Дрыбіна

Пяць жанчын з Магілёўскай вобласці атрымалі статус народнага майстра пажыццёва. Такое рашэнне прыняла камісія пры Беларускім саюзе майстроў народнай творчасці – піша абласны метадычны цэнтр народнай творчасці і культурна-асветнай працы.

Гэта:

• Галіна Анатольеўна Сцепанькова, лазапляценне, Горкі;
• Таццяна Міхайлаўна Чараповіч, шапавальства, Дрыбін;
• Ірына Генадзьеўна Кухціна, саломапляценне, Быхаў;
• Таццяна Міхайлаўна Феськава, лазапляценне, Магілёў;
• Вольга Міхайлаўна Сыцікава, мастацкая апрацоўка ільну, Магілёў.

Галіна Анатольеўна Сцепанькова – пастаянная ўдзельніца выстаў рознага ўзроўню, мае шмат узнагарод. Яе вучні таксама актыўна ўдзельнічаюць у выставах, становяцца дыпламантамі разнастайных конкурсаў.

Для Таццяны Міхайлаўны Чараповіч шапавальства – сямейная традыцыя. Валяў яе тата, якому яна дапамагала з дзяцінства. Таццяна Міхайлаўна таксама актыўна ўдзельнічае ў розных выставах і праводзіць заняткі для дзяцей у клубе "Шапавал" пры Дрыбінскім гісторыка-этнаграфічным музеі.