Дрыбінскія таржкі – свята ад душы

Чацвёрты раз на Іллін дзень адбыліся “Дрыбінскія таржкі”, на якія прыехалі госці не толькі з Беларусі, але і з-за мяжы.

Сёлетняе свята прыйшлося на вялікую спёку, але гэта нікога не спыніла – людзей было болей, чым летась. Фестываль расце проста на вачах і ўжо ў наступны раз можа набыць статус міжнароднага. Праўда, для гэтага трэба, каб у фэсце прымалі ўдзел прадстаўнікі як мінімум пяці краін.

Але што будзе ў наступным годзе, мы яшчэ паглядзім, а ў гэтым свята было цудоўнае! 

Чаго вартыя толькі традыцыйныя крамніцы. Напрыклад, у крамніцы зёлак можна было пакаштаваць розныя гатункі гарбаты на травах, набыць венікі для лазні ці сухацветы. У крамніцы “Добра скеніць” якіх толькі не было прысмакаў! А ў крамніцы селядцоў можна было пакаштаваць розныя стравы з рыбы. Тут жа можна было бавіцца рознымі гульнямі або латарэямі – нудзіцца не было калі.

Таксама на таржках гандлявалі майстры і майстрыхі, пчаляры, кухары – мёд, сыр, вышытыя і плеценыя, драўляныя і гліняныя вырабы – вельмі вялікі выбар тавару. Кожны мог знайсці сабе рэч пад свой густ. Аматараў чытання прымала літаратурная гасцёўня. Арганізацыі знаходзіліся на падворках, можна было зайсці і паглядзець, чым займаюцца там людзі.

Ну і канечне, творчыя калектывы падтрымлівалі атмасферу весялосці на “Дрыбінскіх таржках”. Спевы народныя і эстрадныя, нават тэатр – на месцах для сядзення амаль што недзе было яблыку дзе ўпасці. Выступалі калектывы з розных куткоў Беларусі, а таксама з Расіі. Усіх уразілі абаяльныя вядучыя Сымоніха і Дрыпша, якія ўвесь час сыпалі прымаўкамі ды анекдотамі і любую сітуацыю напаўнялі смехам.

Наступны год для "Дрыбінскіх таржкоў" – юбілейны. Нават шкада, што давядзецца яго чакаць так доўга.

Аляксандра Пералайка