Беларускі пісьменнік, мастак і выдавец Адам Глобус пакінуў на сваёй старонцы ў фэйсбуку допіс пра тое, што агульнага паміж пажарам у Саборы Парыжскай Божай Маці і рэстаўрацыяй касцёла Дзевы Марыі ў Мсціславе.
"Пажар у саборы Парыжскай Божай Маці, хутчэй за ўсё, пачаўся з кароткага замыкання, мяркуюць у французскай паліцыі. Веру. Абапіраюся на ўласны вопыт працы на рэстаўрацыі баракальнага сабора ў горадзе Мсціславе.
Рабочыя, з якімі былі вымушаны працаваць мы – рэстаўратары, не вызначаліся сумленнасцю, уважлівасцю і ахайнасцю. З-за недагляду рабочых касцёл Дзевы Марыі страціў шмат каштоўнага сценапісу, і нават частку знакамітай фрэскі "Забойства ксяндзоў", на якой паказвалася Трубяцкая разня – масавае забойства мірнага насельніцтва, утворанае ў 1654 годзе войскамі Маскоўскай дзяржавы. У разні загінулі амаль усе жыхары Мсціслава, а сам горад надоўга заняпаў і больш ніколі не дасягаў былой велічы", – адзначыў літаратар.