Бібліятэка БДСГА запрашае на выставу, прысвечаную юбілею Ільі Рэпіна

5 жніўня 2024 года споўнілася 180 гадоў з дня нараджэння Ільі Яфімавіча Рэпіна – рускага мастака-рэаліста, педагога, аўтара мемуараў і нарысаў аб знакамітых дзеячах мастацтва. Да гэтай даты бібліятэка БДСГА падрыхтавала вялікую кніжную выставу, прысвечаную жыццю і творчасці гэтага чалавека.

Беларускі перыяд у творчасці Ільі Рэпіна быў звязаны з Віцебшчынай. Увесну 1892 года Ілья Яфімавіч прыехаў з сям'ёй ва ўрочышча Здраўнёва на беразе Заходняй Дзвіны. Да гэтага часу ён ужо быў заможным чалавекам і вядомым мастаком. На беларускай зямлі ён шукаў месца, дзе мог бы летам адпачываць ад сталічнай мітусні.

У Здраўнёва Рэпін стварыў больш за 40 карцін і малюнкаў, у тым ліку "Восеньскі букет", "Беларус", "Месячная ноч. Здраўнёва", "Дуэль", "Надзея з сабакам Пегасам на беразе Дзвіны", а таксама шматлікія эцюды і эскізы.

Так выглядае партрэт "Беларус", напісаны Рэпінам у 1892 годзе. Гэта карціна знаходзіцца зараз у Пецярбургу ў Міхайлаўскім палацы. На ёй – беларускі селянін Сідар Шавура (Шаўроў).

У працах Рэпіна гэтага перыяду ўвасоблена беларуская прырода, захаваны краявіды Здраўнёва, а таксама жыццё і побыт мясцовых сялян. Пацвярджэннем таму могуць служыць яго малюнкі "Паненка ў вёсцы", "Касцы ў полі", "Святочнае гулянне ў Здраўнёва".

У чытальнай зале бібліятэкі БДСГА праходзіць разгорнутая кніжная выстава "Мастак эпохі: 180 гадоў з дня нараджэння Ільі Рэпіна".

На ёй можна ўбачыць фотаальбомы, даведнікі па музеях і галерэях, кнігі пра жыццё і творчасць мастака. Асобным раздзелам выдзелены фотаілюстрацыі карцін беларускага перыяду.

Дарэчы, у 16 км на поўнач ад Віцебска на месцы былой сядзібы Ільі Рэпіна ў 1988 годзе быў створаны музей, які дзейнічае да нашага часу. Вось некалькі фота адтуль.