У Горках ад "Дажынак" ніяк не скончыцца рамонт на амфітэатры

Амфітэатр - гэта частка забаўляльнага комплексу, падубаванага ў Горках да леташніх "Дажынак". Аднак сам комплекс, не паспеўшы адчыніцца, неўзабаве перастаў працаваць. Цяпер на ім ізноў ажывіліся работы. Але ці скончацца яны калі-небудзь?

Пляцоўка на тэрыторыі акадэмічнага гарадка БДСГА ізноў ператварылася ў будаўнічую.

Здаецца, што "Дажынкі" яшчэ наперадзе, а яны ж былі год таму.

Каб давесці да ладу "горацкую жамчужыну", давялося нешта і пабурыць.

Частка амфітэатра, якая месціцца на беразе Ніжняга возера, выглядае прыстойна.

Аднак тое, што бліжэй да корпусаў акадэміі, ізноў разварочана.

Мінакі, з якімі ўдалося пагутарыць, проста ў шоку ад такога марнавання сродкаў. Усе меркаванні зводзяцца да аднаго: навошта ўвогуле было будаваць такі комплекс?

Нехта ўжо падбіў ліхтар. І гэта нягледзячы на тое, што недалёка вісяць відэакамеры.

Пры нарматыве будаўніцтва 24 месяцы аб'ект быў узведзены за восем.

Афіцыйна паведамлялася, што спраектаваны забаўляльны комплекс у Горках быў Магілёўскім інстытутам "Гражданпраект".

Генпадрадчыкам работ выступаў Бабруйскі домабудаўнічы камбінат, а субпадрадчыкамі былі трэст №17 магілёўскага "Лаўсанстрою", 12-й трэст, 8-й "БудБрэст", трэст №13 "Водбуду", абласны "Зеленгас", "Белэлектрамантаж", ММУ "Провентиляция", "Ротан" (Жодзіна), 14-й трэст Гомеля, "Спецавтомонтаж" ды іншыя.

Забаўляльны комплекс каштаваў 75 млрд рублёў.

Фотаздымкі Антона Валадзько