Выбары ў Палату прадстаўнікоў адбудуцца 11 верасня

Сёння 6 чэрвеня быў падпісаны ўказы аб прызначэнні даты выбараў у беларускі парламент. Выбары ў Палату прадстаўнікоў Нацыянальнага сходу Рэспублікі Беларусі адбудуцца 11 верасня, а ў Савет Рэспублікі – з 18 чэрвеня па 18 верасня.

Запланаваная парламенцкая кампанія стане першай пасля адмены санкцый Еўрасаюза. Пры гэтым ЗША канчатковае рашэнне пра лёс санкцый Злучаных Штатаў у дачыненні да Беларусі звязваюць з вынікамі гэтых парламенцкіх выбараў.

З 1996 года парламент у Беларусі складаецца з двух палат: Палаты прадстаўнікоў (ніжняя) і Савета Рэспублікі (верхняя).

Палата прадстаўнікоў Нацыянальнага сходу Рэспублікі Беларусь складаецца са 110 дэпутатаў, якія выбіраюцца на аснове ўсеагульнага, свабоднага, роўнага, прамога выбарчага права пры тайным галасаванні.

Савет Рэспублікі з’яўляецца палатай тэрытарыяльнага прадстаўніцтва. Ад кожнай вобласці і горада Мінска на пасяджэннях дэпутатаў мясцовых Саветаў дэпутатаў базавага ўзроўню і Мінскага гарадскога Савета дэпутатаў абіраюцца па восем членаў Савета Рэспублікі, яшчэ восем членаў прызначаюцца прэзідэнтам.

Ад 2012 года дэпутатам у Палаце прадстаўнікоў ад Горацкага, Дрыбінскага і Мсціслаўскага раёнаў з'яўляецца Міхаіл Волкаў.

Згодна з Канстытуцыяй Рэспублікі Беларусь Палата прадстаўнікоў:

разглядае па прапанове Прэзідэнта або па ініцыятыве не менш як 150 тысяч грамадзян Рэспублікі Беларусь, якія валодаюць выбарчым правам, праекты законаў аб унясенні змяненняў і дапаўненняў у Канстытуцыю, аб тлумачэнні Канстытуцыі;
разглядае праекты законаў, у тым ліку аб зацвярджэнні асноўных напрамкаў унутранай і знешняй палітыкі Рэспублікі Беларусь; ваеннай дактрыны; аб ратыфікацыі і дэнансацыі міжнародных дагавораў; аб асноўным змесце і прынцыпах ажыццяўлення правоў, свабод і абавязкаў грамадзян; аб грамадзянстве, статусе іншаземцаў і асоб без грамадзянства; аб правах нацыянальных меншасцей; аб зацвярджэнні рэспубліканскага бюджэту і справаздачы аб яго выкананні; устанаўленні рэспубліканскіх падаткаў і збораў; аб прынцыпах ажыццяўлення адносін уласнасці; аб асновах сацыяльнай абароны; аб прынцыпах рэгулявання працы і занятасці; аб шлюбе, сям’і, дзяцінстве, мацярынстве, бацькоўстве, выхаванні, адукацыі, культуры і ахове здароўя; аб ахове навакольнага асяроддзя і рацыянальным выкарыстанні прыродных рэсурсаў; аб вызначэнні парадку вырашэння пытанняў адміністрацыйна-тэрытарыяльнага ўладкавання дзяржавы; аб мясцовым самакіраванні; аб судаўладкаванні, судаводстве і статусе суддзяў; аб крымінальнай адказнасці; аб амністыі; аб абвяшчэнні вайны і заключэнні міру; аб прававым рэжыме ваеннага і надзвычайнага становішча; аб устанаўленні дзяржаўных узнагарод; аб тлумачэнні законаў;
назначае выбары Прэзідэнта Рэспублікі Беларусь;
дае згоду Прэзідэнту на назначэнне Прэм’ер-міністра;
заслухоўвае даклад Прэм’ер-міністра аб праграме дзейнасці Урада і адабрае або адхіляе праграму; паўторнае адхіленне палатай праграмы азначае выказванне вотуму недаверу Ураду;
разглядае па ініцыятыве Прэм’ер-міністра пытанне аб даверы Ураду;
па ініцыятыве не менш як адной трэці ад поўнага складу Палаты прадстаўнікоў выказвае вотум недаверу Ураду; пытанне аб адказнасці Урада не можа быць пастаўлена на працягу года пасля адабрэння праграмы яго дзейнасці;
прымае адстаўку Прэзідэнта;
выстаўляе большасцю галасоў ад поўнага складу Палаты прадстаўнікоў абвінавачанне супраць Прэзідэнта ва ўчыненні дзяржаўнай здрады або іншага цяжкага злачынства; на падставе адпаведнага рашэння Савета Рэспублікі прымае большасцю не менш як дзве трэці галасоў ад поўнага складу рашэнне аб зняцці Прэзідэнта з пасады;
адмяняе распараджэнні Старшыні Палаты прадстаўнікоў.

Палата прадстаўнікоў можа прымаць рашэнні па іншых пытаннях, калі гэта прадугледжана Канстытуцыяй.