У гонар юбілея Уладзіміра Ліўшыца адкрылася выстава ў абласной бібліятэцы

"Летапісец зямлі Горацкай" – так называецца кніжная выстава ў Магілёўскай абласной бібліятэцы, прысвечаная юбілею вядомага краязнаўца і навукоўца Уладзіміра Ліўшыца, стваральніка краязнаўчага музея ў нашым горадзе, аўтара шматлікіх выданняў пра гісторыю Горак, Горацкага раёна і БДСГА.

На выставе ў аддзеле беларускай і краязнаўчай літаратуры можна пабачыць не толькі выданні юбіляра, але і матэрыялы пра яго жыццё і дзейнасць.

На сайце Магілёўскай абласной бібліятэкі размешчаны размешчаны электронныя копіі кніг Уладзіміра Ліўшыца.

Даведка

Уладзімір Маісеевіч нарадзіўся ў г. Красны Кут Саратаўскай вобласці Расіі. Скончыў гістарычны факультэт Магілёўскага педагагічнага інстытута (1969). З 1972 г. працаваў у БСГА асістэнтам, старшым выкладчыкам, дацэнтам кафедры філасофіі і паліталогіі, прафесарам кафедры гісторыі дзяржавы і права. Заснавальнік і першы дырэктар Горацкага раённага гісторыка-этнаграфічнага музея (1998—2005). З 2005 г. — рэдактар часопіса "Вестник БГСХА". Па яго ініцыятыве ў Горках у 1992 г. прайшлі першыя Гарэцкія навуковыя чытанні; удзельнічаў у стварэнні музея-сядзібы М. Гарэцкага ў в. Малая Багацькаўка Мсціслаўскага раёна. Адзін з аўтараў калектыўнай манаграфіі аб БДСГА, якая выйшла да 150-годдзя з дня заснавання ВНУ. Арганізатар і старшыня Горацкага раённага краязнаўчага таварыства "Бацькаўшчына", Горацкага раённага культурна-асветніцкага яўрэйскага таварыства імя Б. Іофэ.

Узнагароджаны Ганаровай граматай Прэзідыума Вярхоўнага Савета БССР (1996), Нацыянальнага Сходу Рэспублікі Беларусь (2006), медалём "60 год Перамогі ў Вялікай Айчыннай вайне 1941—1945" (2005), Ганаровымі граматамі Міністэрстваў культуры, сельскай гаспадаркі і харчавання, адукацыі Рэспублікі Беларусь (1996—2006). З 2007 г. жыве ў Ізраілі ў горадзе Нацрат Іліт, займаецца літаратурнай і навуковай працай.

Аўтар больш як 50 кніг і брашур, 650 артыкулаў па філасофіі, паліталогіі, сацыялогіі, гісторыі Горак, гісторыі аграрнай адукацыі і навукі Беларусі, гісторыі БДСГА, этнаграфіі і літаратуразнаўству і інш.