Беларускія правайдары з 1 студзеня будуць захоўваць звесткі аб наведваемых карыстальнікамі сайтах

Беларускія правайдары з 1 студзеня павінны захоўваць звесткі аб наведваемых карыстальнікамі сайтах. Гэта прадугледжана пастановай Міністэрства сувязі і інфарматызацыі Беларусі нумар 6 ад 18 лютага 2015 года, паведамляе БЕЛТА.

У дакуменце адзначаецца, што пастаўшчыкі інтэрнэт-паслуг абавязаны з выкарыстаннем апаратна-праграмнага комплексу фарміраваць і захоўваць актуальныя звесткі аб наведваемых карыстальнікамі інтэрнэт-паслуг інтэрнэт-рэсурсах.

Правайдары будуць захоўваць наступную інфармацыю аб карыстальніках, уключаючы фізічных асоб, у тым ліку індывідуальных прадпрымальнікаў: нумар і дату заключэння дагавора на аказанне паслуг электрасувязі; прозвішча, уласнае імя, імя па бацьку (калі такое ёсць); адрас карыстальніка або адрас устаноўкі канцавога абаненцкага ўстройства (тэрмінала); даныя, што даюць магчымасць вызначыць (ідэнтыфікаваць) карыстальніка інтэрнэт-паслуг або яго канцавое абаненцкае ўстройства (тэрмінал); МАС-адрас або ідэнтыфікацыйны нумар канцавога абаненцкага ўстройства (тэрмінала) карыстальніка інтэрнэт-паслуг сотавай рухомай электрасувязі; для абанентаў сеткі сотавай рухомай электрасувязі - рэквізіты дакумента, што засведчвае асобу (яго назва, серыя, нумар, дата выдачы і назва дзяржаўнага органа, які выдаў дакумент).

Адносна юрыдычных асоб будуць захоўвацца звесткі аб нумары і даце заключэння дагавора на аказанне паслуг электрасувязі; назва (фірменная назва) юрыдычнай асобы, яе юрыдычны адрас; адрас устаноўкі канцавога абаненцкага ўстройства (тэрмінала) карыстальніка інтэрнэт-паслуг; даныя, што даюць магчымасць вызначыць (ідэнтыфікаваць) карыстальніка інтэрнэт-паслуг або яго канцавое абаненцкае ўстройства (тэрмінал); МАС-адрас або ідэнтыфікацыйны нумар канцавога абаненцкага ўстройства (тэрмінала) карыстальніка інтэрнэт-паслуг сотавай рухомай электрасувязі.

Акрамя таго, будуць захоўвацца звесткі пра ўсе паслугі электрасувязі, актываваныя карыстальнікам інтэрнэт-паслуг, а таксама дата, час пачатку і заканчэння злучэнняў, унутраны і знешні IP-адрасы і парты канцавога абаненцкага ўстройства (тэрмінала), даменнае імя або IP-адрас і порт інтэрнэт-рэсурсу, які наведвае карыстальнік інтэрнэт-паслуг, аб'ём перададзеных і прынятых даных.

Пастаўшчыкі інтэрнэт-паслуг забяспечваюць захоўванне актуальных звестак аб наведваемых карыстальнікамі інтэрнэт-паслуг інфармацыйных рэсурсах на працягу аднаго года з дня аказання інтэрнэт-паслуг.

Пастанова ўступае ў сілу з 1 студзеня 2016 года.

belta.by