У школах з'явяцца новыя вельмі цікавыя факультатывы. Вось пра што можна будзе даведацца на занятках

Міністэрства адукацыі зацвердзіла вучэбныя праграмы факультатыўных заняткаў "Святыні роднага краю" і "Духоўная спадчына Беларусі (IX ст. – 1569 г.)". Звесткі пра гэта змясціла pravo.by.

Вучэбная праграма "Святыні роднага краю" разлічана на два гады і арыентавана на вучняў IX-X класаў устаноў адукацыі, якія рэалізуюць адукацыйныя праграмы агульнай сярэдняй адукацыі.

Праграма накіравана на набыццё вучнямі паглыбленых ведаў пра свой край, рэгіён, краіну і выступае ў якасці своеасаблівага "навігатара" па атрыманні ведаў, перапрацоўцы інфармацыі і набыцці практыка-арыентаваных уменняў.

Падчас засваення праграмы будуць разглядацца тэмы:

• спадчына роднага краю;
• помнікі матэрыяльнай культуры;
• духоўная культура;
• славутыя землякі;
• рэлігійна-асветніцкія дзеячы Беларусі;
• страчаная спадчына;
• помнікі археалогіі;
• беларускія святыні.

Праграма "Духоўная спадчына Беларусі (IX стагоддзе – 1569 год)" прызначана для VI класа ўстаноў адукацыі, якія рэалізуюць адукацыйныя праграмы агульнай сярэдняй адукацыі.

Сярод задач праграмы вызначаны такія:

• фарміраванне ў вучняў каштоўнасных адносін да сваёй Радзімы, выхаванне іх на традыцыях духоўнай спадчыны;
• выхаванне ў вучняў павагі да нацыянальнай спадчыны, традыцый, культуры беларускага народа;
• стварэнне ўмоў для развіцця творчай асобы, самаадукацыі.

У выніку засваення праграмы вучні змогуць, напрыклад:

• усвядоміць сваю ідэнтычнасць як грамадзяніна Беларусі на аснове ведаў па гісторыі і асноў культурнай спадчыны беларускага народа;
• сфарміраваць павагу да светапогляду, гісторыі, культуры, рэлігіі, традыцый і каштоўнасцей свайго народу на аснове вывучэння яго духоўнай спадчыны;
• авалодаць цэласнымі ўяўленнямі пра гістарычны шлях беларускага народа на працягу IX ст. – 1569 г.

На занятках будуць разгледжаны тэмы, сярод якіх:

• гістарычныя крыніцы аб духоўным жыцці насельніцтва Беларусі ў IX – сярэдзіне XIII ст.;
• чалавек і прырода ў духоўнай культуры насельніцтва беларускіх зямель;
• правілы жыцця ў побыце беларусаў як адлюстраванне іх духоўных традыцый;
• духоўны подзвіг першых хрысціянскіх асветнікаў на беларускіх землях;
• старабеларуская мова – дзяржаўная мова ВКЛ і носьбіт духоўнай спадчыны беларусаў;
• геральдыка беларускіх гарадоў;
• беларускае народнае дойлідства як адлюстраванне духоўнага свету беларусаў;
• захаванне гістарычнай памяці аб асобах і падзеях беларускай мінуўшчыны.

Прававы акт распрацаваны ў адпаведнасці з Кодэксам Рэспублікі Беларусь аб адукацыі. Пастанова ўступае ў сілу пасля яе афіцыйнага апублікавання.