Былы епіскап Барысаўскі і Мар'інагорскі Веніямін стаў на чале беларускага экзархату. Кіраўнік РПЦ патрыярх Кірыл патлумачыў, чаму быў абраны менавіта гэты святар.
"Цяпер нацыянальны фактар у Беларусі набывае ўсё больш і больш палітычную ролю. І таму, вядома ж, мы прыйшлі да высновы пра неабходнасць, каб сёння на чале беларускай царквы быў чалавек, які нарадзіўся ў Беларусі, ведае беларускую мову, выгадаваны ў беларускім асяроддзі. Каб нават для тых, хто імкнецца ў нашай царкве пабачыць нешта іншароднае ў адносінах да Беларусі, беларускай культуры і беларускага жыцця, каб на прыкладзе ачольніка беларускай царквы, кіраўніка экзархату бачылі чалавека плоццю ад плоці, косцю ад косці свайго народу".
Епіскап Веніямін нарадзіўся ў 1968 годзе ў Лунінцы Брэсцкай вобласці. Па спецыяльнасці – інжынер-радыяфізік. Вучыўся ў Мінскай духоўнай семінарыі і Мінскай духоўнай акадэміі, кандыдат багаслоўя. Узнагароджаны ордэнам свяціцеля Кірыла Тураўскага II ступені (БПЦ), ордэнам Крыжа прападобнай Еўфрасініі Полацкай (БПЦ), а таксама ордэнам прападобнага Серафіма Сароўскага III ступені.