35-гадовы горацкі прадпрымальнік незаконна аказваў паслугі крычаўскім камерцыйным фірмам. Мужчына дастаўляў зерне з Расіі ў Беларусь без ліцэнзіі на міжнародныя перавозкі грузаў. Даход ад гэтай дзейнасці склаў 6,5 тысяч рублёў.
Жыхар Горак займаўся гэтай дзейнасцю з ліпеня па верасень 2017 года. Пры гэтым у мужчыны былі падробленыя дакументы, паводле якіх перавозка тавару ажыццяўлялася толькі па тэрыторыі Беларусі – паведамляе Камітэт дзяржаўнага кантролю.
Парушэнне закону выявілі супрацоўнікі Крычаўскай міжраённай фінансавай міліцыі. Горацкі Следчы камітэт распачаў крымінальную справу. Вядома, што прадпрымальнік добраахвотна сплаціў у бюджэт суму незаконна атрыманага даходу.
Цікава, што ў кастрычніку 2018 года паведамлялася пра падобную гісторыю. Тады гаворка ішла пра жыхара Горак, які перавозіў зерне з Расіі ў Беларусь са жніўня 2017 па сакавік 2018 года. А сума незаконнага даходу складала 8,5 тыс. рублёў.