суб, 21.09.2019
USD2.04|EUR2.26|RUB3.20
Горкі, Дрыбін, Мсціслаў у Viber Горкі, Дрыбін, Мсціслаў у Instagram Горкі, Дрыбін, Мсціслаў у Аднакласніках Горкі, Дрыбін, Мсціслаў ва УКантакце Горкі, Дрыбін, Мсціслаў у Twitter Горкі, Дрыбін, Мсціслаў у Facebook Атрымлівай нашы навіны на e-mail

Беларусы аддаюць перавагу кітайскім інтэрнэт-крамам. 7 фактаў пра онлайн-гандаль

19.06.2019 – 10:08 | 248

Карэспандэнтка Свабоды пабывала на круглым стале "Онлайн-пакупкі беларусаў за мяжой" з удзелам гандляроў, чыноўнікаў, экспэртаў і сабрала самыя важныя факты і лічбы, якія характарызуюць стан інтэрнэт-гандлю і пакупніцкія перавагі беларусаў.

За год беларусы патрацілі каля 700 мільёнаў даляраў

Паводле дасьледаваньняў e-data.by, у 2018 годзе беларусы патрацілі на тавары і паслугі онлайн на 20% больш, чым год таму: агулам на 650-700 мільёнаў даляраў.

Доля інтэрнэт-гандлю ў Беларусі пакуль складае 3,5% ад агульнага таваразвароту. Для параўнаньня: доля онлайн-гандлю ў Расеі – 5%, у краінах Эўразьвязу, Японіі – да 20%.

Палова беларусаў карыстаецца інтэрнэт-крамамі

Як распавёў кіраўнік маркетплэйса Deal.by Максім Марыніч, за апошні год у інтэрнэце куплялі 49% беларусаў, альбо 4,7 мільёна (рост 4%).

9% купляюць тавары толькі на замежных сайтах, 24% – у беларускіх інтэрнэт-крамах, 67% – і там, і там.

Беларусы аддаюць перавагу кітайскім крамам

98% беларусаў, якія купляюць онлайн за мяжой, карыстаюцца кітайскімі інтэрнэт-крамамі. На кітайскіх сайтах бяруць у асноўным тэхніку і электроніку (27%), адзеньне, абутак (26%), касмэтыку (13%), тавары для дзяцей (10%), аўтатавары (8%), спартовыя тавары (4%).

У інтэрнэт-крамах ЗША купляюць 6% беларусаў, Польшчы – 5%, Расеі – 4%.

Пакупнікі глядзяць найперш на цану

Максім Марыніч назваў некалькі вызначальных фактараў, чаму беларусы аддаюць перавагу кітайскім інтэрнэт-крамам. Самы асноўны – беларускі пакупнік вельмі адчувальны да цаны (83% лічаць, што ў замежных інтэрнэт-крамах таньней). Сярэдні чэк пакупак беларусаў на замежных сайтах вырас з 20 да 25 рублёў. Для параўнаньня: у беларускіх інтэрнэт-крамах сярэдні чэк – 70 рублёў.

Яшчэ адзін важны фактар – асартымэнт, выбар тавару (39% лічаць, што пэўных тавараў няма ў Беларусі). Дастаткова высокі ўзровень даверу да пакупкі – 17%.

Да таго ж у кітайскіх інтэрнэт-крамах добра наладжаная сыстэма арбітражу, прадаўцы амаль заўсёды прымаюць бок пакупніка.

На замежных сайтах больш купляюць маладыя

Узрост беларускіх кліентаў замежных інтэрнэт-крамаў – людзі да 30 гадоў.

Абсалютная большасьць беларускіх пакупнікоў замежных інтэрнэт-крамаў – жыхары рэгіёнаў. Па-за Менскам часьцей скардзяцца на аднастайны асартымэнт тавараў.

Улады хочуць, каб інтэрнэт-гандаль стаў больш празрыстым

Начальніца ўпраўленьня арганізацыі гандлю Міністэрства антыманапольнага рэгуляваньня і гандлю Віялета Бразоўская сказала, што да канца 2019 году маюць прыняць новую рэдакцыю Закону аб гандлі, у якой будзе дакладна прапісана, як павінен ажыцьцяўляцца інтэрнэт-гандаль:

"Усе онлайн-пакупкі павінны ажыцьцяўляцца толькі праз кошык. Будзе захоўвацца ўся гісторыя плацяжоў, пакупак, адмоваў, дастаўкі. Калі інтэрнэт-крама на сайце паказвае, што тавар ёсьць, а спажыўцу яго не прывезьлі – гэта парушэньне, непраўдзівая інфармацыя на сайце, пакупніка ўвялі ў зман. Кошт тавару не павінен мяняцца, а то ўчора на сайце адна цана, а калі тавар прывезьлі – іншая. Усё можна будзе адсачыць, і спажывец зможа абараніць свае правы".

У Беларусі плянуюць стварыць Асацыяцыю электроннага гандлю

Замежныя інтэрнэт-крамы ўзмацняюць канкурэнцыю на беларускім рынку інтэрнэт-гандлю. Беларусы ж галасуюць рублём, галоўная рацыя, каб купляць за мяжой, часьцяком – цана. Таму вытрымліваць канкурэнцыю беларускім інтэрнэт-крамам усё цяжэй.

Каб падтрымаць беларускіх інтэрнэт-прадаўцоў і павысіць узровень сэрвісу, плянуецца стварыць Асацыяцыю электроннага гандлю. У ёй будуць прадстаўленыя ўсе ўдзельнікі рынку – тыя, хто займаецца і лягістыкай, і інфраструктурай, і плацяжамі.

Іна Студзінская, svaboda.org

Падзяліцца