пан, 15.07.2024
horki.info в Viber horki.info в Instagram horki.info в Одноклассниках horki.info в ВК horki.info в Facebook horki.info в TikTok horki.info в YouTube Новости horki.info по почте

Жыхароў Горацкага раёна запрашаюць на Купалле – будзем разам шукаць папараць-кветку

05.07.2024 – 17:02 | 1836

У суботу 6 ліпеня ў Горацкім раёне будуць адзначаць традыцыйнае беларускае свята – Купалле. Запрашаюць усіх жадаючых – гаворыцца на сайце райвыканкама.

Купальскія вогнішчы.

Купалле будзем адзначаць у Паршына на пляцоўцы ля Цэнтра культуры. Пачатак – 20:00, завяршэнне – 23:00.

Што ў праграме?

  • Будзе працаваць выязны гандаль.
  • Канцэртная і конкурсна-гульнявая праграма.
  • Пошук "Папараць-кветкі".
  • Дыскатэка.

Што такое Купалле?

Купалле – старажытнае народнае земляробчае свята, звязанае з летнім сонцастаяннем, з росквітам прыроды і летняй цеплыні. Лічылася, што раніцай пасля Купальскай ночы сонца "грае". Яно нібыта плавае ў вадзе далёка на гарызонце, "купаецца". Паводле народных павер'яў, рэкі ў гэту ноч свецяцца асаблівым прывідным святлом, а звяры, птушкі і нават дрэвы атрымліваюць дар мовы.

У старыя часы людзі верылі, што ў гэту ноч а 12-й гадзіне зацвітае папараць-кветка. Хто знойдзе яе, атрымае здольнасць бачыць схаваныя ў зямлі клады і разумець мову звяроў. Каб адшукаць кветку, трэба выправіцца ноччу ў лес аднаму і зайсці ў такі гушчар, каб не чуць ні пеўняў, ні сабак з навакольных вёсак. Папараць-кветка маленькая, але яна ззяе ў цемры яскравым агеньчыкам.

Святкаванне Купалля ўключала ў сябе абрады, павер'і і варажбу. Днём дзяўчаты збіралі купальскія зёлкі, што, як лічылася, мелі асаблівую лекавую моц. Цэнтральнае месца займала купальскае вогнішча.

Вельмі пашыранай на Купалле была варажба, асабліва на замужжа – на рачную плынь пускалі вянкі, загадваючы на "суджанага".

Раніцай пасля Купальскай ночы дзяўчаты і хлопцы сустракалі світанак, купаліся ў вадзе, каталіся па траве з купальскімі росамі, каб набрацца сілы.

Якая была адметнасць свята ў нашым рэгіёне?

На Магілёўшчыне ў традыцыі было абіраць "Дзеўку-Купалу". Яе ролю выконвала самая прыгожая дзяўчына вёскі. Іншыя дзяўчаты распраналі яе, абмотвалі лісцем ды галінкамі, а на галаву клалі вянок. Потым вялі ў лес, дзе былі падрыхтаваныя вянкі. Іх дзяўчына з завязанымі вачыма раздавала іншым: якой маладзіцы даставаўся свежы вянок – той жыць шчасліва, а каторай завялы – той "не бачыць шчасця".

Што нашы продкі елі на Купалле?

Амаль па ўсёй Беларусі на Купалле гатавалі кулагу: ягады ставілі на агонь і варылі, потым дадавалі ў іх крыху мукі, мёд ці цукар, варылі да кісельнага стану. Падавалі на стол з хлебам ці блінамі.

Іншым ласункам была верашчака – страва для мачання бліноў. На Магілёўшчыне яе гатавалі так: спачатку падсмажвалі сала, мяса ці каўбасу на патэльні, потым туды дадавалі муку і зёлкі.

Падзяліцца

Viber Аднакласнікі УКантакце Facebook Email