Яшчэ ў 2008 годзе аддзелу адукацыі Мсціслаўскага райвыканкаму былі выдзеленыя 325,1 млн рублёў на набыццё і ўстаноўку кампутарнага абсталявання і праграмнага забеспячэння. Тэхніку павінны былі атрымаць дзве сярэднія навучальныя ўстановы: установа адукацыі “Гімназія горада Мсціслава”, а таксама сярэдняя школа №2.

Аднак набытае абсталяванне да сёння не было распакаваным і захоўвалася ў памяшканнях, дзе цёк дах.

Акрамя ўсяго ў гімназіі былі таксама выяўленыя парушэнні тэхнічных нарматыўных прававых актаў у галіне тэхнічнага нармавання і стандартызацыі, зямельнага заканадаўства, парадку прыёму грашовых сродкаў.

Як паведаміла Горацкая газета “Ленінскі шлях”, па выніках праверкі тры службовыя асобы Мсціслаўскага райвыканкаму прыцягнутыя да дысцыплінарнай адказнасці, а з дырэктарам гімназіі не працягнуты кантракт на новы тэрмін. Акрамя гэтага кампетэнтныя органы разглядаюць пытанне пра прыцягненне да адміністрацыйнай адказнасці службовых асобаў гімназіі і аддзелу адукацыі райвыканкаму.