У мінулую суботу беларускія фізкультурнікі адзначылі свой Дзень. У Горацкім, Дрыбінскім і Мсціслаўскім раёнах аматары спорту мелі магчымасць паспаборнічаць адразу ў некалькіх дысцыплінах. На здымках – эпізоды спартыўнага свята, якое адбылося ў Горках.

У шматбор’і сярод камандаў арганізацыяў першае месца занялі фізкультурнікі райаддзелу па надзвычайных сітуацыях, другое – прадстаўнікі хлебазаводу, трэцяе – каманда рэмкома. Усіх камандаў-удзельніцаў тут было дванаццаць.

У Мсціславе асноўнай часткай свята таксама сталі спартыўныя турніры. Аматары спорту спаборнічалі ў падняцці гіры, настольным тэнісе, шашках, шахматах, дартсе. А юныя футбалісты аспрэчвалі першае месца ў чэмпіянаце на прыз клуба “Скураны мяч”.

<>У Дрыбіне дзейства адбывалася ў Цэнтры фізкультурна-масавай працы. Там гулялі валейбольныя каманды, спаборнічалі гіравікі, стралкі і аматары “малога” тэнісу. А більярдысты правялі так званы камерцыйны турнір.

У БДСГА адбыліся спаборніцтвы па міні-футболе сярод супрацоўнікаў. Фінальная гульня прайшла паміж камандамі зааінжынернага і аграэкалагічнага факультэтаў. Асноўны час завяршыўся без забітых галоў, што ў гэтым відзе спорту бывае не часта і сведчыць аб роўнасці камандаў.

Пераможцаў вызначылі пенальці. Пасля асноўнай серыі – зноў нічыя (3:3). І толькі пасля сёмга ўдару перамаглі эколагі – 5:4.

Эдуард Брокараў