|
АўтаВАЗ падтрымаюць за нашы грошы |
|
02.12.2009 г. |
 Лідэр Руху "За Свабоду" Аляксандр Мілінкевіч (на фота) лічыць, што рэзкае падвышэнне мыты на ўвоз аўтамабіляў у выніку стварэння мытнага саюзу супярэчыць інтарэсам мільёнаў беларусаў.
− Улада кажа, што трэба паставіць заслон старым машынам, каб Беларусь не стала звалкай старых аўтамабіляў. Але чамусьці ў нас ніхто добраахвотна не адмаўляецца ад еўрапейскага "хламу", на карысць новай прадукцыі АўтаВАЗу. Мыты вельмі завышаныя і на новыя аўтамабілі. У некаторых выпадках мыта падвысіцца амаль у 10 разоў. Гэта выкрывае сапраўдную мэту новай мытнай палітыкі − абарона расійскіх вытворцаў легкавых аўтамабіляў. Згода беларускіх уладаў на новыя мыты дэманструе цынічнае стаўленне да інтарэсаў сваіх грамадзян, − лічыць Аляксандр Мілінкевіч.
На думку лідэра Руху "За Свабоду", аўтамабіль, які даўно ператварыўся з раскошы ў штодзённую неабходнасць, стане менш даступным. Беларусам прапануць купляць менш якасныя, не сучасныя і дастаткова дарагія расійскія машыны. Беларуская прамысловасць не атрымае ад гэтага ніякіх выгад.− Калі б у Беларусі былі нармальныя і паслядоўныя адносіны з краінамі Еўразвязу, дык у нашай краіне даўно была б распачата зборка папулярных мадэляў аўтамабіляў, а мыта на новыя еўрапейскія аўтамабілі была б вельмі нізкія. Выпадак мыты на аўтамабілі – адзін з шматлікіх прыкладаў поўнай неадпаведнасці беларускім нацыянальным інтарэсам спробаў утварэння мытнай прасторы з постсавецкімі краінамі, − падсумоўвае Аляксандр Мілінкевіч.
milinkevich.org |
Каментарыi