Адміністрацыйная камісія Горацкага райвыканкаму на чале з Галінай Ляшэнка наклала штраф на мясцовага верніка-пратэстанта Пятра Маланачкіна. Ад яго патрабуюць выплаціць мясцоваму бюджэту пяць базавых велічыняў (175 тысяч рублёў) за парушэнне правілаў добраўпарадкавання.

Падставай для абвінавачвання стаў інфармацыйны стэнд, які Пятро Маланачкін змайстраваў каля пяці гадоў назад і вывесіў паміж дрэвамі на тратуары на праспекце Інтэрнацыянальным у Горках.

На стэндзе, што неаднаразова ламалі невядомыя, увесь гэты час выстаўляліся кнігі, часопісы, брашуры рэлігійнага зместу, а таксама Евангеллі, якія кожны мінак мог браць сабе задарма.

Сп.Маланачкін перакананы, што згодна з Канстытуцыяй мае права бесперашкодна распаўсюджваць Божае слова і не парушае беларускае заканадаўства, бо ягоная інфармацыйная выстава не замінае ні руху транспарту, ні пешаходам. У сваё апраўданне рэлігійны актывіст прадэманстраваў камісіі фотаздымкі разбітага тратуару і лужынаў вакол стэнду. На думку хрысціяніна, менавіта бяздзейнасць камунальных службаў у гэтым месцы Горак парушае правілы добраўпарадкавання.

Таксама сп.Маланачкін нагадаў, што неаднаразова звяртаўся ў выканкам з просьбай узгадніць месца размяшчэння стэнду, але не атрымаў станоўчага адказу.

Не пераканаў адміністрацыйную камісію і той факт, што нядаўна раённы суд пакараў за хуліганства жыхара Горак, які спрабаваў зламаць рэлігійную выставу Пятра Маланачкіна.

У сваю чаргу мясцовыя евангелісты мяркуюць пра іншую магчымую прычыну ціску на свой стэнд. Справа ў тым, што яны сабралі некалькі тысяч подпісаў супраць пабудовы АЭС у Беларусі і накіравалі іх у адміністрацыю прэзідэнта. Атрыманы адтуль адказ сведчыць, што зараз усе подпісы знаходзяцца ў Горацкім райвыканкаме.