 Сёлета ў БДСГА для праходжання цэнтралізаванага тэставання зарэгістравалася 3586 чалавек. Самымі папулярнымі прадметамі сярод абітурыентаў, якія будуць пісаць тэсты ў Горках, сталі абедзве дзяржаўныя мовы, фізіка і біялогія. Аднак усіх сваіх канкурэнтаў абышла матэматыка, здаваць якую пажадалі амаль 800 чалавек.
Як распавёў дэкан факультэту давузаўскай падрыхтоўкі і прафарыентацыі Уладзімір Гудкоў уступная кампанія-2009 не адрозніваецца павышаным ажыятажам. Колькасць пададзеных заяваў на цэнтралізаванае тэставанне перавышае мінулагоднюю ўсяго на дзвесце.
Уладзімір Іванавіч адзначыў, што ў гэтым годзе кожны ахвочы можа здаваць толькі тры прадметы, а заданні да тэстаў маюць два варыянты – беларускамоўны і рускамоўны. Выключэннем застаюцца бланкі заданняў па замежных мовах. ЦТ у акадэміі будзе абслугоўваць каля 100 чалавек. Каб зрабіць іх працу больш лёгкай, а таксама не ствараць дадатковай мітусні, у аўдыторыю для напісання тэстаў варта прыходзіць за паўгадзіны.
Важным з’яўляецца таксама не прапусціць дзень тэставання: беларуская мова – 15 чэрвеня, руская мова – 16 чэрвеня, гісторыя Беларусі – 18 чэрвеня, матэматыка – 21 чэрвеня, грамадазнаўства – 23 чэрвеня, фізіка – 26 чэрвеня, біялогія – 28 чэрвеня, замежныя мовы – 30 чэрвеня, хімія – 1 ліпеня. Для тых, хто не зможа з’явіцца на ЦТ па ўважнай прычыне, устаноўлена рэзервовая дата – 6 ліпеня. Аднак у гэты дзень можна здаць толькі адзін тэст.
Выпрабаваць свае сілы ў цэнтралізаваным тэставанні і зразумець, наколькі складана сённяшнім абітурыентам, усім жадаючым можна ў Інтэрнэце. На сайце http://testirovanie.org ёсць магчымасць ацаніць свой узровень ведаў і меркаваную адзнаку па асноўных дысцыплінах школьнай праграмы. Аднак УА "Рэспубліканскі інстытут кантролю ведаў" не нясе адказнасць за якасць і змест такіх тэстаў. |
