У Горках гэтай даце таксама было прысвечана некалькі афіцыйных мерапрыемстваў. Мясцовыя арганізацыі, якія займаюцца праблемамі людзей з абмежаванымі магчымасцямі, правялі ў раённым цэнтры культуры музычны канцэрт, падрыхтавалі салодкія пачастункі. У сваю чаргу інваліды зладзілі выставу самаробных сувеніраў, а жанчына з абмежаванымі магчымасцямі Любміла Гусарава адкрыла дэбютную фотавыставу. Яе здымкі прысвечаны Горацкай зямлі, яе архітэктуры і прыродзе.

Свой унёсак у арганізацыю мерапрыемстваў зрабіў і мясцовы грамадскі лідэр Андрэй Юркоў, які лічыць важным дапамагаць людзям, якія з аб’ектыўных прычынаў не здольныя весці звыклы лад жыцця.

- Трэба рабіць добрыя справы, дапамагаць тым, хто не ў стане паклапаціцца пра сябе сам. З такіх учынкаў будуецца адчуванне, што мы – адзіны народ, адна сям’я, - сказаў Андрэй Юркоў у інтэрв’ю нашаму сайту.