Дэсаветызацыя і дэкамунізацыя назваў раёнак у вобласці пачалася ў 1991 годзе з бялыніцкай "Зары камунізму". Газету перайменавалі на "Зару над Друццю".

Праз дзевятнаццаць гадоў на пераназванне наважыліся ў Горках. Тут раёнка завецца "Ленінскім шляхам".

– Пакуль вывучаем народную думку наконт гэтага. Райвыканкам пакуль анкетаванне праводзіць. Старшыня нашага райвыканкаму даў такую ўстаноўку: калі народ будзе "за", то тады будзем мяняць. У асноўным народ – "за". Наша першая гістарычная назва – "Горацкі веснік". У 1918 годзе наша газета была створана. Апошні "Ленінскі" застаўся на ўсю рэспубліку", – зазначае супрацоўніца рэдакцыі "Ленінскага шляху".

Над тым, ці варта мяняць назву, разважаюць і ў рэдакцыі газеты горацкай сельскагаспадарчай акадэміі "Савецкі студэнт".

– Сёлета ў нас юбілей, і мяняць назву газеты рэктар лічыць немэтазгодным. А так, у прынцыпе, даўно існуе такое меркаванне – памяняць назву выданню. Рэдактар збіраецца абвясціць конкурс сярод супрацоўнікаў акадэміі і студэнтаў, каб яны нейкія варыянты прапанавалі. Цяперашняя назва, канечне, патыхае нечым такім…

Акрамя горацкіх "Ленінскага шляху" і "Савецкага студэнта", назвы яшчэ пяці раёнак нагадваюць пра ідэалы камуністычнага рэжыму.

– Для іх, як той казаў, гэта пэўная брэндавая назва. "Шлях кастрычніка" – як свята працы. Такая асацыяцыя ў людзей. Не савецкая, а менавіта звязаная з нейкімі працоўнымі дасягненнямі", – лічыць супрацоўніца рэдакцыі хоцімскага "Шляху кастрычніка".

Трымаюцца свайго "Ударнага фронту" на Шклоўшчыне. Да гэтай назвы прызвычаіліся жыхары раёну – сцвярджае супрацоўнік рэдакцыі.

– Ударны фронт – гэта ж не тое, што вайна нейкая, а тое, што па-ўдарнаму працуюць. Цяпер мы пакуль уздымаць гэтае пытанне не будзем.

Толькі тры раёнкі з Магілёўшчыны маюць свае старонкі ў інтэрнэце. Прапісаліся ў сусветным віртуальным сеціве згаданая "Зара над Друццю" ды "Асіповіцкі край". Мае інтэрнэтны адрас і шклоўскі "Ударны фронт". Не паспеў ён там прапісацца, яго ўганаравалі інтэрнэт-прэміяй Міністэрства інфармацыі.

Радыё “Свабода”